愛華頓冇得救？博彩公司提早「降班派彩」

愛華頓喺周六(24日)晚英超作客以0比4大敗於熱刺腳下，開季2戰全敗合共吞7蛋，球隊已接近崩潰邊緣，博彩公司Paddy Power宣布投降，提早派彩畀買咗愛華頓降班嘅投注者，明顯睇死「拖肥糖」下季英冠見。

愛華頓開鑼戰主場0比3不敵白禮頓，今場作客熱刺，情況更加惡劣，遭對手圍攻，開賽14分鐘，熱刺中場比蘇馬勁射入網打開紀錄。

轉個頭愛華頓門將比克福特接應回傳，卻控球甩腳，被孫興民搶到，射入空門。換邊之後，基斯甸羅美路頂入角球，加上孫興民窄角度射入，贈愛華頓4蛋，打開勝利之門。

由於愛華頓表現令人慘不忍睹，即使今季僅進行第2輪聯賽，Paddy Power已宣布提早派彩畀買咗愛華頓降班嘅投注者。愛華頓近年陷入財困，上季更因為財政違規被罰扣8分，「拖肥糖」過去3季都係勉強護級成功，今季以噩夢開局，恐怕難翻身。