格連活特又入波　曼聯後悔未？

周一(26日)凌晨法甲，馬賽落後之下，憑新加盟翼鋒格連活特頂入1球，主場逼和蘭斯2比2，呢位22歲英格蘭新星上月由曼聯轉投馬賽之後，開季踢2場聯賽入3球，成為馬賽近11年以來，第1位首2場法甲入到3球或以上嘅球員，唔知曼聯管理層有冇後悔出售佢呢？

馬賽上半場25分鐘由夏列特射入打開紀錄，並繼續創造唔少具威脅攻勢，但都未能拉開紀錄。換邊之後，形勢出現大逆轉，51分鐘蘭斯由後衞艾基美勁射入網扳平，僅過4分鐘，中場科芬拿左路個人突破之後，窄角度射入，反超前2比1。

馬賽落後之下傾力反擊，踢到71分鐘，格連活特近門頂入成2比2，執番1分，賽後法國傳媒大讚格連活特表現太出色，特別係控球方面屬於法甲超班水準。值得一提，格連活特今季聯賽上陣2場入3球，反觀前度效力球會曼聯今季英超2戰全隊僅入2球，難怪網民紛紛指紅魔鬼放走格連活特，絕對係最錯誤決定。