摩連奴有「說明書」　費特首次帽子戲法

除咗格連活特之外，另1位前曼聯球員費特都喺周一(26日)凌晨土超入波，協助費倫巴治作客大勝里澤斯堡5比0，呢位31歲巴西國腳今場連中三元，職業生涯首次上演「帽子戲法」，費倫巴治主帥摩連奴似乎擁有費特「說明書」，令佢發揮出最大潛能。

費特司職防中甚少入波，效力曼聯期間上陣213場僅入14球，就算上季轉投費倫巴治後，踢35場都只係入3球，今仗入波已經等於上季總入球數字，令人嘖嘖稱奇。

外媒分析指費特可以「鐵樹開花」，同摩連奴今季執教費倫巴治有好大關係，因為「寸王」執教曼聯時期，2018年夏天豪花4,700萬鎊(約4.8代港元)向薩克達收購費特，但半年後，摩連奴被紅魔鬼炒魷，費特冇咗呢位伯樂關照，效力曼聯大部分時間表現都令人失望，兩人今季再次合作，費特果然立即翻生。

費倫巴治贏波之後，今季聯賽3戰取得2勝1和，同伊約普並列榜首。