利物浦「恐怖數據」　施洛傳控戰術更勝哥帥？

利物浦今季英超2戰2勝，兼保持不失球，上場主場以2比0擊敗賓福特，更加創出一項驚人數據，紅軍全場傳球成功率高達92%，成為OPTA自從2003/04年球季有統計以來，利物浦單場最高傳球成功率，新帥施洛可以媲美曼城「傳控大師」哥迪奧拿。

利物浦今場唔只傳球精準，而且反擊速度非常快，特別係打開紀錄1球，解圍角球立即反攻，兩腳波已經傳畀路易斯迪亞斯射入，可見紅軍仍有保留前主帥高普快速反擊元素。

施洛表示，自己戰術思維同高普接近，對於今場比賽仍有需要改善地方：「我哋創造大量攻勢，好滿意球員表現，唯一不足之處係未能盡快入多幾球，提早奠定勝局。」值得一提，高普當年執教利物浦首2場聯賽取得1勝1和，施洛領軍後2戰2勝，更勝一籌。