「J神」重返西甲　加盟華歷簡奴

前皇馬中場占士洛迪古斯將再戰西甲，根據「轉會權威」記者羅曼諾(Fabrizio Romano)爆料，呢位33歲哥倫比亞國腳已經同華歷簡奴達成口頭協議，雙方將會簽約1年，並有權續約多1年，只要通過體測就可以落實。

占士洛迪古斯曾於2014至20年效力皇馬，但期間因為表現欠佳，曾經被外借去拜仁慕尼黑2季，近年效力過愛華頓、奧林比亞高斯、聖保羅，甚至去過卡塔爾搵食。當全世界以為「J神」球員生涯已玩完，佢喺今屆美洲國家盃有出色表現，射入1球及6次助攻，率領哥倫比亞打入決賽。

雖然哥倫比亞喺決賽不敵阿根廷，屈居亞軍，但占士洛迪古斯仍然當選賽事最佳球員，依家更加可以重返西甲比賽。