迪基亞踢1場即坐冷板　前途暗淡

前曼聯門將迪基亞今夏加盟費倫天拿，並於上周中歐協聯附加賽首回合第1次上陣，但卻失3球，僅打和普斯卡斯學院3比3。呢位33歲西班牙鋼門表現備受批評，周一(26日)凌晨意甲主對威尼斯，迪基亞立即被貶為後備，前途暗淡。

費倫天拿今場意甲即使只係對新升班球隊威尼斯，教練柏拿甸奴都唔敢冒險，用番泰拉施安奴擔任正選把關，成功力保不失，但亦入唔到波，雙方打和0比0。

費倫天拿今季2場聯賽都由泰拉施安奴把關，只失1球，反觀迪基亞踢1場歐協聯已失3球，而且對手只係匈牙利球隊普斯卡斯學院，難免令人對佢失去信心。

預料費倫天拿下場歐協聯附加賽次回合生死戰作客普斯卡斯學院，迪基亞可能會再次做「觀眾」，恐怕未來日子難有披甲機會。