辛祖飛赴意大利　加盟祖雲達斯好事近

曼聯翼鋒查頓辛祖前途問題有新發展，根據英國《每日郵報》爆料，紅魔鬼已經安排呢位24歲英格蘭球星乘坐私人飛機前往意大利，預料會去祖雲達斯總部接受體測，好大機會以借用身份加盟呢支意甲勁旅。

查頓辛祖因為同曼聯領隊坦哈格不和，上季有接近一半時間被雪藏，今年1月被外借去多蒙特。雖然查頓辛祖今夏返回紅魔鬼之後，已經同坦哈格冰釋前嫌，但始終不獲重用，開季後2場英超都冇入選大軍名單。英國《曼徹斯特晚報》指坦哈格認為現時人腳充裕，可以放走周薪高達30萬鎊(約310萬港元)嘅辛祖，為球會節省開支，改善財政狀況。

曼聯原本將查頓辛祖標價為4000萬鎊(約4.1億港元)，但冇球會願意收購，會方現時作出讓步，可以接受外借，祖雲達斯亦已表明只會借用，雙方有望達成協議。英超及意甲夏季轉會市場將於當地時間8月30日晚關閉，查頓辛祖前途好快有定案。