華荷域起孖　祖雲達斯大勝升榜首

周二(27日)凌晨意甲，祖雲達斯憑杜辛華荷域梅開二度，作客以3比0大勝維羅納，成為今季聯賽唯一2戰2勝球隊，升上榜首，祖記新帥莫達獲得夢幻開局。

祖雲達斯上仗主場大炒科木3蛋，今仗作客一樣採取主動搶攻，開賽28分鐘祖記前場壓逼成功，立即打反擊，19歲土耳其新星基倫耶迪斯送出妙傳，由杜辛華荷域射入打開紀錄。

僅過11分鐘，祖雲達斯又入波，兩位今季獲提升上一隊嘅小將合作，20歲翼鋒美班古拿左路傳中，21歲右閘沙禾拿頂入成2比0。

換邊後冇耐，比利時U21小國腳美班古拿又創造威脅，殺入禁區後遭對手踢跌，博到12碼，杜辛華荷域主射入網，呢位24歲塞爾維亞國腳由2019/20年球季開始至今，有18場意甲入到2球或以上，屬於同時期最多入波「2+」球員。

祖雲達斯開季2場聯賽都大勝3比0，會方向博洛尼亞挖角，請來42歲少帥莫達執教，果然立竿見影，誓要重奪失落4季嘅意甲冠軍。