利物浦執平貨　開始接觸基艾沙

英超豪門利物浦今夏仍然未簽入球員，根據「轉會權威」記者羅曼諾(Fabrizio Romano)爆料，紅軍把握轉會市場關閉前最後衝刺，開始接觸祖雲達斯翼鋒費達歷高基艾沙，有望以1,500萬歐元(約1.3億港元)至2,000萬歐元(約1.74億港元)簽入呢位26歲意大利國腳。

祖雲達斯新教練莫達早已表明費達歷高基艾沙唔屬於組軍藍圖之內，甚至公開要求佢盡快轉會，加上呢位「星二代」將於明夏約滿，祖記願意以低價1,500萬至2,000萬歐元出售佢。

雖然早前傳出巴塞隆拿有興趣簽基艾沙，但並未有行動，利物浦現時加入爭奪，貪佢夠平，而且有不俗實力，可以同另外2位翼鋒穆罕默德沙拿、路易斯迪亞斯輪流上陣，應付英超、歐聯、英足盃、英聯盃4線作戰。

費達歷高基艾沙屬於意大利奪得2021年歐國盃冠軍嘅功臣，但近年因為受傷患問題影響無復當年之勇，上季為祖雲達斯各項賽事上陣37場入10球及3次助攻，由於佢太容易受傷，能否適應英超硬朗風格，成為疑問。