東拿利坐完10個月「波監」　可復出鬥森林

紐卡素中場辛度東拿利因為違規賭波，上年被判罰全球停賽10個月，禁令周二(27日)屆滿，呢位24歲意大利國腳可以趕及復出踢周四(29日)凌晨英聯盃第2圈作客諾定咸森林，提升「喜鵲」爭勝本錢。

辛度東拿利效力AC米蘭期間違規賭波，上年10月底被意大利足總重罰全球停賽10個月，並要上8個月戒賭課程，即使已轉投紐卡素，都要「坐波監」。呢位「新派路」今年3月被英格蘭足總控告，指佢加盟紐卡素後，曾於2023年8月12日至10月12日期間50次違規賭波，再被判罰停賽2個月，幸好獲得緩刑，只要佢唔再犯，就唔需要服刑停賽2個月，因此佢原本「禁賽令」8月27日屆滿後，就可以復出。

辛度東拿利近日積極操練，獲得領隊艾迪侯域讚賞：「東拿利身體狀態非常好，但佢太耐冇比賽，嚟緊需要透過實戰，重拾比賽節奏。」紐卡素下場英聯盃對諾定咸森林，正係辛度東拿利「熱身賽」好機會。

不過，紐卡素面臨失去1位主將，後衞捷比亞不滿開季後做後備，有意離隊，盛傳可能轉投愛華頓。