不滿冇盃捧　C朗要求艾納斯請施丹執教

C朗加盟沙特阿拉伯豪門艾納斯接近2年，仍然未有錦標落袋，感到不滿，根據沙特傳媒爆料，呢位葡萄牙巨星要求會方聘請前皇馬主帥施丹執教，誓要一圓中東之旅冠軍夢。

艾納斯早前沙超盃決賽不敵希拉爾，C朗不但批評隊友表現，甚至拒絕領取亞軍獎牌，傳出佢要求會方為球隊「換血」踢走4位外援。艾納斯新一季聯賽開鑼戰和波失分，等到第2輪先至贏波，爭標之路難行，沙特傳媒指C朗希望盡快換帥，聘請昔日效力皇馬時期嘅教練施丹領軍。

C朗曾於皇馬同施丹合作，兩人一齊捧過1次西甲及3次歐聯冠軍等錦標，呢段時間，C朗為皇馬上陣114場入112球及30次助攻，佢認為施丹有能力為艾納斯打破錦標荒。

施丹現時並冇教職在身，可以隨時上任，依家就睇艾納斯管理層能否說服呢位法國名宿加盟。