無緣入「廠」　施捷斯尼宣布掛靴

波蘭著名門將施捷斯尼早前同祖雲達斯解約之後，一度傳出可能重返阿仙奴，但呢位34歲鋼門現時正式宣布退休，結束職業球員生涯。

施捷斯尼喺社交網發文話：「2006年我離開家鄉華沙，加盟阿仙奴，懷住成為職業球員嘅夢想，當時唔知可以為世界最大球會效力，並為國家隊上陣84次，我唔只實現夢想，仲達到意想不到嘅高度，我同歷史上最優秀球員一齊比賽，感到非常榮幸，旅程已到終點，係時候反思同感恩，要多謝好多人，特別係球迷。」

施捷斯尼2006年加入阿仙奴青年軍，3年後升上一隊，但被外借去賓福特，2010/11年球季開始為兵工廠上陣，協助球隊奪得2次英足盃冠軍。

施捷斯尼2015至17年被阿仙奴外借去羅馬2季，其後正式轉投祖雲達斯，捧過3次意甲冠軍等錦標。雖然之前有傳佢可能重投阿仙奴，甚至去沙特阿拉伯搵食，最終都係決定掛靴。