損失慘重　白禮頓貴價新兵踢9分鐘受傷

白禮頓早前豪花2,600萬鎊(約2.7億港元)收購些路迪中場奧列尼，呢位23歲丹麥國腳喺周三(28日)凌晨英聯盃首次為球隊上陣，但踢咗9分鐘就受傷退下火線，實在黑仔。

白禮頓今仗主場以4比0大勝卡維尼，晉級第3圈，但付出沉重代價，奧列尼正選上陣，遭對手粗野攔截，傷勢唔輕，需要由兩位軍醫扶住離場，未知需要抖幾耐。

奧列尼上季為些路迪各項賽事上陣49場，射入19球及18次助攻，獲白禮頓重金收購，原本被寄予厚望，但依家受傷，打亂領隊靴斯拿部署。