車路士最後一塊拼圖　瞄準艾雲東尼

車路士今夏已經簽入10位球員，但增兵行動仍然未結束，根據英國《太陽報》爆料，車仔將於周六(31日)凌晨轉會市場關閉前，力爭簽入1位射手，頭號目標係賓福特前鋒艾雲東尼。

車路士雖然中前場猛將如雲，但主要都係翼鋒及進攻中場，中鋒人選不足，踢呢個位置嘅尼高拉斯積遜水準飄忽，領隊馬利斯卡希望簽入1位可靠中鋒。事實上，車仔9號球衣仍然懸空，早已傳出會方計劃買射手，艾雲東尼現時成為大熱人選。

呢位28歲英格蘭國腳早已打算離隊，今季英超仍未上陣，據悉可能去沙特阿拉伯搵食，但依家車路士加入搶人，情況可能有變，畢竟留喺英超比賽，更有利事業發展。估計艾雲東尼轉會費為5,000萬鎊(約5.2億港元)，車路士絕對負擔得起。