德國失2位中場指揮官　或重召阿富汗奇兵

德國2位中場指揮官卻奧斯、根度簡喺今屆歐國盃結束後，分別退出國家隊，卻奧斯更加已經排靴，主帥拿高斯文急需要補充中場大腦，已經有4年冇入選「日耳曼兵團」嘅緬恩斯主將拿迪安阿美利，有望獲重召。

現年27歲嘅拿迪安阿美利雖然出生於德國，但其實係亞洲人，來自阿富汗家庭，佢曾於效力賀芬咸、利華古遜、熱拿亞，今年1月加盟緬恩斯後，表現愈來愈好，近期分別喺德國盃及聯賽入波，狀態大勇，愈來愈多聲音要求拿高斯文徵召拿迪安阿美利。

緬恩斯教練軒歷臣話：「阿美利踢過德國隊，點解唔可以再次披甲呢?」阿美利2019年進身德國大國腳，2020年11月之後就再冇入選，但有為德國U23參加2021年東京奧運男足，並射入2球，可惜分組賽出局。

拿迪安阿美利表示，自己夠實力代表德國隊，等緊拿高斯文徵召，德國將於下月初出戰歐國聯，拿迪安阿美利能否入選，大家拭目以待。