費倫巴治「紅魔化」　計劃簽岩拉伯特

費倫巴治近年先後簽入曼聯中場費特及聘請摩連奴執教，球隊有意繼續「紅魔化」，根據「轉會權威」記者羅曼諾(Fabrizio Romano)爆料，呢支土耳其勁旅提出以先借後買方式，收購上季被費倫天拿外借去曼聯嘅中場蘇夫恩岩拉伯特。

現年28歲嘅蘇夫恩岩拉伯特上季被費倫天拿外借去曼聯，各項賽事上陣30場，包括英足盃決賽正選披甲，表現出色成為捧盃功臣。不過，曼聯放棄買斷呢位摩洛哥國腳，佢已返回費倫天拿，今季2場意甲都踢正選。

由前曼聯主帥摩連奴執教嘅費倫巴治提出以200萬歐元(約1,700萬港元)借用蘇夫恩岩拉伯特，明夏再以1,200萬歐元(約1億港元)買斷佢，兩間球會正在討價還價之中，爭取轉會市場關閉前達成協議。