基艾沙加盟利物浦　施洛打造最豪華鋒線

利物浦官網宣布，收購意大利國腳費達歷高基艾沙已經完成，呢位26歲翼鋒周四(29日)抵達利物浦做體測，完成後簽約4年，佢喺都靈機場出發嗰陣表示「利物浦時間」已經展開。利物浦完成收購後，將擁有6名頂尖前鋒爭逐3個正選位置，堪稱英超最豪華鋒線。

同祖雲達斯只剩1年合約嘅基艾沙，轉會費只係1,250萬鎊，被譽為今夏「最抵收購」之一。基艾沙喺都靈出發前向記者表示：「我好心急想成為利物浦一員，我同屋企人對呢次轉會都好開心，多謝祖雲達斯同球迷一直對我咁好，但依家係利物浦時間，我等唔切啦！」

英國傳媒報道，「紅軍」領隊施洛無意放走主力，希望6名頂級前鋒候命，除基艾沙之外，利物浦仲有穆罕默德沙拿、迪亞高祖達、路易斯迪亞斯、達雲紐尼斯同加普，個個都係獨當一面嘅星級球員。

費達歷高基艾沙獲分發14號球衣，呢個號碼在紅軍有特殊意義，上手擁有者係前隊長佐敦軒達臣，現任利華古遜主帥沙比阿朗素效力利物浦時期亦係着14號。