【有片】東拿利感動回歸：感覺似新加盟

紐卡素周四(29日)凌晨喺英聯盃第2圈，憑互射12碼淘汰諾定咸森林，呢場波主角係意大利中場辛度東拿利，呢位球星因違規賭波被全球停賽10個月後，今仗回歸獲球迷熱烈歡迎，佢賽後走去同隨隊作客嘅球迷深情擁抱，形容自己係「新加盟球員」。

辛度東拿利相隔308日後回歸球場，唔少球迷都拎住橫額同意大利國旗為佢打氣，辛度東拿利雖然久疏戰陣，但級數明顯高班，賽後獲《Chronicle Live》評為全場最高分(9分)球員。領隊艾迪侯域賽後表示：「佢經歷一段孤獨嘅困難時刻，但佢處理得好好，好開心復出時刻終於到臨，我哋得到一個頂級球員。」

辛度東拿利同球迷激情慶祝：https://x.com/i/status/1828904186991218845　

辛度東拿利今場踢咗62分鐘，完場後佢主動走去到球迷擁抱致謝，呢位24歲中場表示：「我好興奮，我感覺似新加盟球員，上季只係踢過8場聯賽令我痛苦，紐卡素係頂級球隊，有頂級球迷，好開心我係紐卡素球員。」