紐尼斯同球迷開拖停5場　利物浦唔使上身

今夏美洲盃4強賽事出現騷亂，烏拉圭多名球員衝上看台同球迷開拖，南美足協周四(29日)宣布，對5名烏拉圭球員判以停賽處分，當中前鋒達雲紐尼斯將停賽5場，不過今次禁令只限國際賽，利物浦唔使「上身」。

烏拉圭喺美洲盃4強輸畀哥倫比亞後，烏拉圭球員家人喺看台上受到滋擾，達雲紐尼斯等多位球員即時衝上看台保護家人，期間曾經揮動摺凳同出拳。南美足協決定罰達雲紐尼斯停賽5場，熱刺中場賓坦古亞停賽4場，朗奴阿拿奧祖、馬泰斯奧利華拉同荷西基文尼斯各停賽3場。

今次停賽只限國際賽事，所以佢哋可以如常喺英超、西甲等賽事上陣，達雲紐尼斯將缺席烏拉圭下周對危地馬拉嘅熱身賽，以及之後4場世盃外圍賽。