蘭斯達爾將投修咸頓　阿仙奴獵物西甲騷Quali

據英國傳媒報道，阿仙奴已接納修咸頓收購蘭斯達爾嘅開價，將以總值2,500萬鎊轉會費賣走呢位英格蘭國腳。阿仙奴亦火速展開買替補行動，目標直指愛斯賓奴門將祖安加西亞，呢位西班牙小國腳周四(29日)喺西甲「零封」馬德里體育會，為愛斯賓奴搶到今季西甲第1分。

蘭斯達爾上季失去正選後，一直希望離隊尋求上陣，今次修咸頓將支付1,800萬鎊轉費，外加700萬鎊獎金條款說服阿仙奴放人，呢位26歲門將已起程去做體測。阿仙奴放走蘭斯達爾後，將全力收購西班牙小國腳祖安加西亞，轉會權威Fabrizio Romano透露雙方已傾掂個人條款，阿仙奴或會啟動佢合約內2,100萬鎊買斷條款。

愛斯賓奴一直強調唔會出售祖安加西亞，周四凌晨西甲作客馬體會，呢位23歲門將仍然正選上陣，佢全場作出7次撲救，助愛斯賓奴0比0悶和馬體會。愛斯賓奴教練干沙利斯賽後表示：「我一直都話，我哋唔會賣祖安加西亞，但如果有球會拎錢嚟啟動買斷條款，我哋都無能為力。」