【官宣】莫高高加盟尼斯　神童重新起步

法甲勁旅尼斯宣布，成功向多蒙特借用德國前鋒尤素法莫高高1季，呢位前鋒4年前以16歲之齡為多蒙特上陣，係德甲史上最年輕上陣同入球紀錄保持者，可惜近年發展停滯不前，今次轉戰法甲希望可以重新起步。

19歲嘅莫高高轉會後表示：「多蒙特喺我心入面有特別位置，我喺呢度出道同成名，好多謝所有合作過嘅教練同隊友。」多蒙特總監基爾亦表示：「多蒙特前鋒有好大競爭，莫高高得唔到需要嘅上陣時間，我哋會繼續保持聯繫，希望佢今季得到成功。」

不過，莫高高可唔可以返多蒙特都係未知數，因為尼斯有權喺借用期滿後，用1,700萬歐元將佢買斷。