車路士清洗兩門將　歐聯冠軍踢般茅

轉會窗關閉前，車路士連續外借兩位門將，其中貴價門將阿列沙巴拿加外借畀般尼茅夫，柏度域則外借到斯特拉斯堡，全部為期一年。

29歲嘅Kepa2018年加盟車路士買入價為8,000萬歐元，佢表現其實唔差，幫車路士贏過歐霸同歐聯，但終於不受重用，上季被外借到皇馬一季，雖然協助銀河艦隊贏得西超盃、西甲及歐聯冠軍，但最終不獲留用，6年間其轉會身價跌到得番1,200萬歐元，最終被外借到弱旅般尼茅夫。

24歲嘅柏度域上季在車路士有較多上陣機會，全季上陣31場，普捷天奴被辭退後佢亦失勢，現時新帥馬利斯卡嘅正選門將係羅拔山齊士，後備門將係祖贊臣，柏度域被打入冷宮，近日落實被外借到斯特拉斯堡，新球季將會在法甲打拚。