C朗做抽籤嘉賓變罰企　淪為「撳掣機器」

今屆歐聯抽籤有別以往嘅「抽波仔」，由於36隊踢「瑞士制聯賽」相當複雜，所以抽籤改由電腦程式編排，不過歐洲足協為增加儀式感，仍然請嚟保方同C朗拿度做抽籤嘉賓，保方負責抽出種子球隊，而C朗就負責撳掣編出賽程，結果成個鐘頭重覆呢個動作，令C朗悶到發呆。

C朗獲安排撳呢個關乎各隊命運嘅按鈕，最初佢都非常投入面露笑容，但係同一個動作不斷咁重覆，C朗亦明顯覺得冇癮，笑容消失之餘，更一度喺等候期間叉腰，而且要諗方法「加戲」，例如喺為母會士砵亭撳掣嗰，特別隆重咁用雙手去撳以示尊重，唔少網民都戥慘被罰企嘅C朗可憐。

不過，C朗此行都有收穫，佢獲歐洲足協頒發獎座，表揚佢係歐聯史上入波最多球員，呢位葡萄牙前鋒歷來踢咗183場歐聯，拎到140個入波。