車路士輸波尷尬晉級　抽籤最驚呢樣嘢！

英超名牌車路士今屆出戰歐協聯，估唔到附加賽就幾乎出事，周五(30日)凌晨作客瑞士塞維特輸1比2，兩回合合計贏3比2尷尬晉級。歐協聯周五晚進行抽籤，車路士「牌面上」超晒班，最大憂慮可能係要舟車勞頓去到山旮旯地方作客。

首回合領先2球嘅車路士，今場14分鐘由尼干古射入12碼領先，以為勝券在握下，被塞維特連入2球反輸1比2，好在最終保住總比數3比2嘅勝果，尷尬躋身36強正賽。領隊馬利斯卡賽後解釋：「領先後我哋錯失3至4個機會，對手入波就打返起。今場個草地唔太理想，氣溫又成30度，比賽環境令我擔心，但我覺得車路士係值得晉級一隊。」

歐協聯36隊出爐，同歐聯一樣改用「瑞士制聯賽」，但每隊只係要踢6場，6個檔次入面各抽一隊做對手。被列為第1檔嘅車路士，喺歐協聯陣容大超班，最大名氣嘅對手只有費倫天拿、貝迪斯等等，但就好大機會要去白俄羅斯、塞浦路斯、亞美尼亞、斯洛文尼亞、摩爾多瓦、黑山等地方作客。