麥巴比再食白果　皇馬逼和拉斯彭馬斯

周五(30日)凌晨西甲賽事，皇家馬德里作客只能1比1逼和拉斯彭馬斯，開咧3場聯賽第2度失分，焦點人物基利安麥巴比繼續「死火」，全場9次射門都冇波入，登陸西甲後第1個入波仍未出現。

皇馬今場一開波就食悶棍，摩里路5分鐘為主隊先開紀錄，皇馬之後連環炮轟，69分鐘憑雲尼斯奧斯祖利亞射入12碼追平，但之後無以為繼，最終只能踢成1比1平手。

麥巴比今仗踢足全場，9次射門有5次被封阻，只得2次命中目標，佢登陸西甲以來3場聯賽仍然係0入波、0助攻，似乎仍未適應西甲賽事。

皇馬教練安察洛堤賽後表示：「我哋搵唔返上季嘅穩定性，困難比想像中大，好彩呢3場聯賽顯示出嘅問題都好明顯，我嘅戰術要畀球員更清晰嘅指示，盡快作出改善。」