【官宣】韋格賀斯投阿積士　實現爺爺遺願

荷甲勁旅阿積士周五(30日)宣布，32歲前鋒韋格賀斯由般尼加盟，雙方簽約2年。呢位荷蘭國腳時隔6年再戰荷甲，表示加盟阿積士係實現爺爺嘅遺願。

韋格賀斯出道初期踢過安曼、荷華高斯同阿爾克馬爾等荷蘭球隊，今次加盟阿積士會着25號，佢透露背後嘅感人故仔：「我爺爺係阿積士球迷，轉會前我同爸爸揀球衣號碼，我問爺爺有冇邊個鍾意嘅數字，但係爸爸唔記得。之後我見到爺爺係喺25號過身。當我返到英國執行李，酒店房卡顯示25號，嗰刻我就覺得要着25號。」

韋格賀斯2年前加盟般尼，近2季先後被外借去比錫達斯、曼聯同賀芬咸，但喺荷蘭國家隊仍然受到重用，充當「後備殺手」非常稱職。