鬥唔過錢　歐洲兩大鋒霸齊去沙特

歐洲各豪門今夏增兵都「就住就住」，兩大鋒霸艾雲東尼同域陀奧森漢去留遲遲未定，卒之喺轉會窗關閉前有答案，賓福特射手艾雲東尼落實以4,000萬鎊(約4億港元)轉投沙特球隊吉達艾阿里，該沙特球會更可能再以天價簽下域陀奧森漢，組成無敵鋒線征戰沙特。

艾雲東尼轉會已經落實，轉會費4,000萬鎊，簽約4年，年薪高達1,500萬鎊(約1.5億港元)，吉達艾阿里畀嘅條件，遠遠超出任何一支英超隊，爭贏都好合理。

吉達艾阿里同時向域陀奧森漢開出豐厚條件，該非洲前鋒過去一直同巴黎聖日耳門同車路士談判，但進展緩慢，吉達艾阿里向拿玻里開出高達8,000萬歐元(約6.88億港元)轉會費，年薪4,000萬歐元，同樣秒殺所有歐洲競爭者。

「轉會專家」羅曼諾報道，域陀奧森漢雖仍未答應吉達艾阿里條件，佢想等埋車路士最後答覆，然後先做決定，但車路士絕無可能開出接近條件，拿玻里亦希望收取天價轉會費，似乎該射手轉赴沙特是唯一結局。