【官宣】曼聯今夏第6簽　完成最後一塊拼圖

歐洲5大聯賽夏季轉會市場關閉，曼聯完成第6簽，正式宣布中場文路爾烏加迪由巴黎聖日耳門(PSG)加盟，雙方簽約5年，至於出身於球隊青訓系統嘅中場麥湯米尼轉投意甲球隊拿玻里。

文路爾烏加迪已經完成體測，並出席簽約儀式，佢話：「能夠加盟世界最偉大球會，感覺實在不可思議，曼聯係一支充滿鬥心嘅球隊，我都係一位充滿鬥心嘅球員，會方為我介紹發展大計，前景令人興奮。」

開季之前，曼聯已向PSG提出收購文路爾烏加迪，一度陷入膠着，呢位23歲烏拉圭國腳亦一直缺陣PSG今季賽事，最終兩間球會達成協議，以5,000萬鎊(約5.1億港元)轉會費成交，當中4,200萬鎊為固定轉會費，另外800萬鎊為浮動轉會費。

文路爾烏加迪成為曼聯今夏第6位新加盟球員，另外5位分別係前鋒約舒亞舒克斯、中場施高干尼、後衞蘭尼約羅、馬菲斯迪歷特、馬沙拉奧，其中18歲馬里新星施高干尼會先加入曼聯U21磨練。