杜林創造3球　國米大勝阿特蘭大

周六(31日)凌晨意甲，上季冠軍國際米蘭以4比0大勝阿特蘭大，國米前鋒馬古斯杜林成為主角，個人創造3球，包括射入2球及傳波導致對手擺烏龍，演出光芒四射。

開賽3分鐘，國際米蘭就打開紀錄，馬古斯杜林禁區右路傳中，阿特蘭大中堅迪占士堤出腳攔截，反而踢入自己龍門。僅過7分鐘，尼高路巴列拿把握對手解圍不遠，喺禁區頂第一時間凌空抽射入世界波，為國米拉開至2比0。跟住馬古斯杜林起腳，可惜中柱彈出。

換邊之後，馬古斯杜林終於正式入波，趁對手頭槌解圍失誤，近門射入，呢位27歲法國國腳之後再建一功，個人梅開二度，協助國際米蘭大勝4比0，今季意甲3戰取得2勝1和，暫時升上榜首。