落「車」入「廠」　史達寧踢晒4大豪門

歐洲5大聯賽夏季轉會市場關閉前最後一刻，各間球會完成多宗交易，最受矚目必定係英超市場，阿仙奴正式宣布，落實借用車路士翼鋒史達寧1季，意味呢位29歲英格蘭球星繼踢過利物浦、曼城、車路士之後，將效力第4支英超豪門。

車路士新帥馬利斯卡日前已經表明棄用史達寧，就算佢留隊，都唔會有上陣機會，由於冇球會願意收購史達寧，車仔惟有退而求其次，將佢外借，阿仙奴趁機借用，領隊阿迪達似乎仍然對史達寧抱有一線期望。史達寧周薪高達32.5萬鎊，據悉車路士需要負擔一半人工，並且免借用費。

與此同時，阿仙奴將翼鋒雷斯尼爾遜外借去富咸，可以為史達寧騰出位置。史達寧加盟阿仙奴後，揚言會畀球迷見到最佳狀態嘅自己。

不過，兵工廠鋒線球員人才濟濟，本身已經有李安度杜沙特、布卡約沙卡、加比爾馬天尼利，史達寧入「廠」後，要爭正選並唔容易。