咁大整蠱　阿仙奴新兵極速受傷

阿仙奴日前豪花3,700萬歐元(約3.2億港元)收購皇家蘇斯達中場米基爾馬連奴，點知呢位28歲西班牙國腳操練期間，同隊友加比爾馬加希斯相撞，導致輕微骨折，需要缺陣數星期，嚴重打亂領隊阿迪達部署。

阿仙奴將於周六(31日)晚英超主場對白禮頓，阿迪達喺賽前記者會透露米基爾馬連奴嘅傷勢：「馬連奴當時好興奮，佢同加比爾馬加希斯相撞，導致肩膀受傷，可能有輕微骨折。」據悉米基爾馬連奴將會再接受詳細檢查，以確定需要抖幾耐。

值得一提，阿仙奴上年夏天簽入祖利安添巴，呢位荷蘭後衞首場聯賽受重傷，難免令人擔心米基爾馬連奴重演添巴悲劇。