利物浦外借19歲新星　益高普前助教

利物浦今夏有多人離隊，轉會市場關閉前一刻，再有1位球員走人，會方宣布將19歲中場巴斯迪外借去薩爾斯堡1季，呢支奧地利球隊現時由高普前助教連達斯執教，紅軍算係益自己友。

巴斯迪4年前由切爾達加入利物浦青年軍，2022年夏天簽新合約，同年9月歐聯對阿積士，以後備上陣，成為紅軍史上喺歐聯最年輕披甲球員。呢位西班牙U21小國腳原本前途一片光明，但上年3月受重傷長抖，上季各項賽事僅上陣3次。

由於利物浦中場人才濟濟，巴斯迪留隊難有上陣機會，所以會方決定將佢外借去其他球隊磨練。薩爾斯堡新帥連達斯曾經兩度喺利物浦擔任前主帥高普副手，今年5月離開紅軍，佢非常了解巴斯迪潛力，加上同利物浦關係良好，最終成功借用呢位新星。