格連活特2分鐘入2球　創造70年紀錄

周日(1日)凌晨法甲，馬賽作客以3比1擊敗圖盧茲，翼鋒格連活特又有佳作，2分鐘內閃電入2球，今季已有5球進帳，並成為馬賽近70年以來，首位開季頭3場聯賽入到5球或以上嘅球員，表現銳不可當。

馬賽今仗佔盡上風，開賽15分鐘38秒，格連活特喺禁區左路窄角度抽射入網，踢到17分鐘，呢位22歲英格蘭球星冷靜射成2比0，兩個入波都係來自路爾斯軒歷基斯嘅助攻。

圖盧茲落後之下，再連番「送禮」，先有前鋒麥利粗野踢對手，被球證出示紅牌趕出場，跟住後衞加斯威爾擺烏龍，令馬賽領先至3球。臨完場前，圖盧茲由巴比卡入波破蛋，對戰局已經冇影響。

格連活特今季由曼聯轉投馬賽，保持高水平發揮，踢3場聯賽都有波入，共合轟入5球，協助球隊取得2勝1和，馬賽僅用2,600萬歐元(約2.24億港元)就買到呢位神鋒，實在物超所值。