【官宣】辛祖上「車」　曼聯勁蝕5,000萬鎊

英超嘅夏天轉會窗關閉差唔多1日，車路士周日(1日)凌晨終於宣布，成功向曼聯借用翼鋒查頓辛祖。據報車仔下季要「強制性」用2,300萬鎊將辛祖買斷，意味曼聯喺呢單交易勁蝕5,000萬鎊！

辛祖喺車仔會着19號波衫，佢簽約後表示：「非常興奮，倫敦係我成長嘅地方，好開心可以返嚟。我喺曼城青年軍嗰陣就識馬利斯卡，領隊講嘅計劃令人興奮，我期待將入波同助攻帶畀車路士。」

曼聯喺3年前用7,300萬鎊天價喺多蒙特收購辛祖，但上季同領隊坦哈格反面後被掟入雪櫃，只得24歲就被「賤價」拋售，一買一賣賬面足足蝕咗5,000萬鎊。