坦哈格施洛4次聯賽交鋒　都分出勝負

香港時間周日(1日)晚上11點將上演英超「雙紅會」曼聯主場對利物浦，其中一大焦點係雙方荷蘭籍領隊坦哈格、施洛正面交鋒，兩位光頭名帥以往曾於荷甲聯賽4次碰頭，各贏2次，可以話係勢均力敵。

坦哈格同施洛喺8月初「美國之旅」交過手，利物浦以3比0大勝曼聯，但始終係熱身賽，並唔可以作準。翻查紀錄，坦哈格執教阿積士期間，曾經4次聯賽遇上由施洛領軍嘅球隊，首次交鋒係2019年12月，施洛帶領阿爾克馬爾主場以1比0擊敗阿積士，3個月後作客再贏阿積士2比0，「雙殺」坦哈格。

不過，施洛轉投飛燕諾後，就被坦哈格食住，2021/22年球季阿積士聯賽兩循環分別以2比0及3比2擊敗飛燕諾。換言之，坦哈格同施洛4次聯賽交鋒，都分出勝負，至於今場英超「雙紅會」，邊位光頭佬會勝出，大家拭目以待。