積遜繼續敗家　車仔畀水晶宮逼和

周日（1日）英超頭場之一上演倫敦打吡，車路士雖有箭頭尼高拉斯積遜先拔頭籌，但呢位「敗家仔」依然頻頻失機，最終被水晶宮逼和1比1，頭3輪只得1勝1和1負，繼續海鮮波。

車仔上場聯賽狂數狼隊6比2，今場陣容上只係作出1個變動，由新兵柏度尼圖代替梅迪歷擔正，另一新兵查頓辛祖只係喺看台睇波。車仔藉住主場之利，一開波即刻撳住水晶宮嚟打，先有高爾彭馬於右路扣大位起左腳妙射，僅僅出界，之後馬度基快腳一彈，可惜過唔到水晶宮門將甸恩軒達臣，去到25分鐘馬度基快放一段交畀高爾彭馬，佢再橫傳畀空晒嘅尼高拉斯積遜近射破網，呢位箭頭連續2場聯賽都先開紀錄，車仔半場拎住1粒返入更衣室。

易邊後車仔未有放鬆，高爾彭馬妙射罰球被甸恩軒達臣僅僅撲出，呢頭唔入，轉個頭就到水晶宮把握到機會，伊比爾治伊斯於禁區外彎入世界波扳平，其後尼高拉斯積遜兩番失機，最終各一言和，頭2場聯賽輸晒嘅水晶宮，終於取得今季第1分。

同時間另一場英超，紐卡素憑哈維班尼斯同阿歷山大伊沙克各建一功，喺主場以2比1擊敗熱刺，亦令熱刺今季首嘗輸波滋味。