坦哈格「記者會大勝」：失波係球員犯錯　我又唔係哈利波特

曼聯喺英超「雙紅會」0比3大敗於利物浦腳下，領隊坦哈格再次發揮「記者會贏家」本色，反駁各界批評，堅稱自己戰術冇問題，失波係由於球員失誤造成，仲話自己唔係「魔法師」哈利波特，冇辦法令球隊立即脫胎換骨，並需要時間重回正軌。

曼聯今場陷入劣勢，主帥坦哈格嘅戰術部署，再次遭到傳媒及球迷批評，佢接受訪問時，竟然推卸責任：「我唔認為戰術系統有問題，否則以前就唔會贏波同捧盃，我哋近2季奪得2項冠軍，除咗曼城之外，我哋係贏得最多冠軍嘅球隊，今場犯錯，屬於球員個人失誤造成，利物浦的確踢得好，但我冇預期會失咁多波，無論如何，我哋仍然會爭奪冠軍，呢方面唔會改變。」

曼聯2連敗後，幾時可以重回正軌，坦哈格話：「需要時間，你必須清楚，我唔係哈利波特。」根據外國博彩公司開出嘅盤口，坦哈格同愛華頓領隊戴治屬於「下一位被炒領隊」大熱，睇怕畀坦哈格重建球隊嘅時間已無多。