梅拿雙喜臨門　入波兼破拜仁史上披甲紀錄

周日(1日)深夜德甲，拜仁慕尼黑主場以2比0擊敗弗賴堡，即將35歲嘅老將湯馬士梅拿成為主角，射入1球之外，並以710次上陣，打破傳奇門將美亞嘅紀錄，成為拜仁史上最多次披甲球員，賽後隊友一齊同佢慶祝創造歷史。

拜仁今場圍攻對手，踢到37分鐘，哈利卡尼頭槌攻門，省中對方球員手部，球證睇完VAR後，吹罰犯手球，判12碼，哈利卡尼親自主射入網，取得個人今季首個聯賽入波，並累積攻破第17支德甲唔同球隊大門。

戰至59分鐘，球迷最期待畫面出現，湯馬士梅拿後備入替米高奧利斯，成為拜仁歷史「上陣王」，呢位德國名將不負所望，78分鐘展示超卓個人技術，接應基拿比傳中波，一控一射入網，非常精彩。

弗賴堡踢到補時原本有機會破蛋，但前鋒盧卡斯賀拿主射12碼高出，注定輸0比2。拜仁、海登咸、RB萊比錫成為今季德甲僅有3支2戰全勝球隊。

賽後拜仁球員喺更衣室用汽球砌成710字樣，同湯馬士梅拿慶祝打破紀錄，梅拿為拜仁上陣710場入245場及269次助攻。