祖雲達斯悶和羅馬　益咗國際米蘭

周一(2日)凌晨意甲大戰，祖雲達斯主場只能同羅馬打和0比0，雙方全場各自只有1次射門中目標，戰情非常沉悶。祖雲達斯開季2連勝斷纜之後，將榜首之位讓畀上季冠軍國際米蘭。

祖雲達斯今季首2場聯賽，同樣以3比0分別擊敗科木及維羅納，但今仗遇上傳統勁旅羅馬，佔唔到明顯優勢，全場8次射門只有1次中目標。

不過，羅馬亦唔好得去邊，7次射門1次中目標，呢支首都球隊今季3戰仲未贏過，其中2場打和0比0，教練迪羅斯面臨愈來愈大壓力。

祖雲達斯雖然失2分，但創下近10年首次開季前3場聯賽不失球，重現昔日固若金湯防線。現時祖雲達斯同國際米蘭都係3戰2勝1和，同樣淨得6球，國米暫時憑較多總入球坐上榜首之位。