施洛夢幻開局　追平艾歷臣17年前紀錄

利物浦喺英超「雙紅會」作客大勝曼聯3比0，加上前2場同樣以2比0分別擊敗葉士域治、賓福特，主帥施洛成為自2007年艾歷臣之後，近17年首位第一次執教英超球隊，頭3場聯賽全勝兼不失球嘅領隊。

艾歷臣2007年夏天成為曼城領隊，首3場英超分別贏韋斯咸2比0，同樣以1比0擊敗打比郡、曼聯，第4場0比1不敵阿仙奴。呢位瑞典名帥早前不幸病逝，佢生前表示自己係利物浦球迷，施洛今次率領利物浦3戰全勝兼不失球，可以話係向艾歷臣致敬。

另外，施洛表示紅軍今場贏波關鍵在於前鋒積極回防：「我哋前鋒好多時積極回防，因為要贏呢種大戰，就必須咁做，我知道曼聯會採取壓逼踢法，鋒線球員必須回防，如果路易斯迪亞斯冇做到應該回防嘅工作，隨時會令戰局出現逆轉。」