迪比仲有市場　西維爾華歷簡奴有興趣

轉會窗關閉，仲有一批自由身球員未有班落，當中包括荷蘭前鋒迪比。該30歲射手今夏歐國盃踢足，佢同馬體會約滿後冇再續約，變成自由身，據報西維爾同華歷簡奴都有興趣，今個國際賽檔期畀佢選擇。

迪比上季為馬體會上陣31場，入9球2助攻，今夏歐國盃上陣6場1入球1助攻，協助荷蘭打入4強，同馬體會約滿後，佢喺德國《轉會市場》身價估值為1,000萬歐元。

傳媒報道，迪比現時獲西維爾及華歷簡奴兩支西甲球隊斟介，巴甲法林明高及沙特球隊亦有接觸，迪比希望留在歐洲比賽，今期荷蘭點兵歐國聯，朗奴高文未有徵召迪比，似乎係畀時間佢處理落班事宜。