法國兩位皇馬球星受傷退隊　無緣歐國聯大戰

法國出戰歐國聯兩場大戰對意大利、比利時前夕，爆出不利消息，兩位效力皇馬嘅球星曹亞文尼、費蘭特文迪都因為受傷退隊，領隊迪甘斯已經補選拉素中場古安杜斯、阿士東維拉左閘盧卡斯迪治尼填補空缺。

左後衞費蘭特文迪有份為皇馬踢上場西甲對貝迪斯，65分鐘受傷退下火線，據悉佢右腳脛骨受傷，無奈退出今次法國隊名單。不過，費蘭特文迪並非法國主力，相信佢缺陣，對球隊影響唔大。

反而中場曹亞文尼近年屬於法國正選，佢無緣今次兩場歐國聯，難免打亂主帥迪甘斯部署，屆時可能用AC米蘭中場尤索夫科芬拿擔任正選。

不過，最頭痛都係皇馬教練安察洛堤，因為本身已有靈魂人物祖迪比寧咸、卡馬雲加養傷，依家曹亞文尼、費蘭特文迪、西班牙中場丹尼施巴路斯都加入「十字兵」行列，令「銀河艦隊」陣容更加殘缺不整。