C朗「清洗名單」有佢？迪尼斯遭艾納斯解約

沙特阿拉伯豪門艾納斯早前沙超盃決賽1比4大敗於希拉爾腳下，巨星C朗批評隊友表現，盛傳佢要求清洗4位外援，會方果然行動，宣布同僅加盟1年嘅後衞阿歷士迪尼斯解約，呢位31歲巴西球星將轉投巴甲球隊保地花高。

阿歷士迪尼斯上年夏天由曼聯轉投艾納斯，簽約2年，獲得700萬鎊(約7,200萬港元)年薪，呢位以助攻力強見稱嘅左閘上季各項賽事上陣40場，並有3球進帳，但雙方現時決定提早1年解約。

據悉艾納斯因為要騰出外援位置畀剛由RB萊比錫來投嘅法國後衞施馬根註冊，所以犧牲阿歷士迪尼斯。

阿歷士迪尼斯恢復自由身後，好快有球會斟介，根據「轉會權威」記者羅曼諾(Fabrizio Romano)爆料，佢已經同意重返巴甲，加盟保地花高，雙方將會簽2年半合約。