阿仙奴新兵傷勢手尾長　長抖近兩個月

阿仙奴新簽中場米基爾馬連奴上月底操練期間，同隊友加比爾馬加希斯相撞，導致輕微骨折，根據英國《每日郵報》最新爆料，呢位28歲西班牙國腳傷勢嚴重，最快都要10月下旬國際賽期結束之後，先至可以復出。

阿仙奴領隊阿迪達早前已經透露，米基爾馬連奴需要養傷一段日子，最新估計可能要等到10月20日凌晨英超對般尼茅夫，先至有機會復出。呢位身價達3,700萬歐元(約3.2億港元)嘅中場，仲未為兵工廠披甲，就要休息近兩個月，令阿迪達大失預算。

加上中場主將迪格蘭賴斯上場英超對白禮頓，被罰紅牌，下場「倫敦打吡」作客熱刺，需要停賽，考起阿迪達排陣功力。