【官宣】韋利安有班落　加盟奧林比亞高斯

韋利安6月底約滿離開富咸之後，一直未有球會收留，曾傳出呢位36歲老將可能被逼掛靴，幸好現時出現突破，希臘球隊奧林比亞高斯宣布簽入韋利安，令佢可以延續球員生涯。

韋利安喺薩克達打出名堂，其後加盟車路士，效力7年捧過英超、英足盃、英聯盃、歐霸盃冠軍，4年前轉投另一支倫敦勁旅阿仙奴，但僅1季就離隊，重返巴甲母會哥連泰斯。韋利安過去2季效力富咸，表現不俗，各項賽事上陣67場入10球，但由於年齡大，不獲續約。

韋利安仍然希望留喺歐洲球壇，已經接受奧林比亞高斯開出嘅合約條件，佢曾經表示自己有能力踢到40歲，鬥志十足。