曼聯搵定梳爾接班人　睇中富咸左閘

夏季轉會市場剛剛關閉，曼聯已經為明年1月冬季轉會市場，制定增兵計劃，根據英國《太陽報》爆料，由於左後衞勞基梳爾經常受傷，一旦情況冇好轉，紅魔鬼就會收購富咸左閘安東尼羅賓遜，作為勞基梳爾嘅長期替代人選。

現年27歲嘅安東尼羅賓遜4年前由韋根加盟富咸，當時轉會費僅200萬鎊，呢位美國國腳以體能強見稱，助攻助守，上季各項賽事上陣多達44場，曾經吸引曼城、AC米蘭、國際米蘭注意，據悉安東尼羅賓遜現時身價已升至3,000萬鎊(約3.1億港元)。

雖然富咸唔希望安東尼羅賓遜離隊，但如果有大球會開出高額轉會費及薪酬，相信難以阻止安東尼羅賓遜跳槽。