A米準備換帥　兩場大戰決定方辛加命運

意甲勁旅AC米蘭今季聘請方辛加執教，成績反而仲差，上場聯賽作客僅逼和拉素2比2，開咧後3戰未贏過，僅2和1負。根據意大利媒體《轉會窗》爆料，如果AC米蘭今個月歐聯對利物浦及意甲對國際米蘭，再次失利，方辛加就會被炒。

AC米蘭過去5季由皮奧利領軍，捧過1次意甲冠軍，上季獲得亞軍，但位名帥仍不獲留用，改由51歲葡萄牙人方辛加接手執教，效果令人大失所望，今季首輪聯賽主場對拖連奴，落後2球之下，驚險逼和2比2。

最離譜係作客1比2不敵新升班球隊帕爾馬，加上上仗打和拉素2比2，換言之A米每場都失2球，防線非常脆弱。

據悉AC米蘭管理層為免今季「報廢」，開始考慮換帥，嚟緊歐聯對利物浦及意甲對國際米蘭，將成為方辛加最後自救機會，如果有乜三長兩短，佢好大機會開季6星期就下台。

盛傳AC米蘭有可能請前祖雲達斯主帥阿里基接任教練，佢曾於2010至14年執教A米，協助球隊奪得2010/11年度意甲冠軍。