卡斯米路成箭靶　老婆用一張相大反擊

曼聯中場卡斯米路上場英超2次犯錯，成為球隊0比3不敵利物浦嘅大罪人，遭輿論猛烈批評。「卡嫂」Anna Mariana為老公感到不值，並作出反擊，上載一張卡斯米路球員生涯捧過嘅獎盃照片到社交網，展示呢位巴西球星嘅偉大成就。

卡斯米路上仗連番甩漏，導致曼聯上半場落後2球，結果半場休息後，領隊坦哈格立即用20歲小將高利亞入替卡斯米路，對於呢位32歲名將實在係一大侮辱。

傳媒、球迷、網民紛紛批評卡斯米路表現差，冇能力再踢正選。不過，Anna Mariana力撐老將，上載一張獎盃大合照，包括5座歐聯、3座世冠盃等錦標，要令批評者睇清楚卡斯米路嘅成就，必須獲得尊重。

其實卡斯米路上季水準已嚴重下滑，加上周薪高達35萬鎊(約360萬港元)，曼聯今夏一直有意出售佢，但搵唔到買家，焗住留用，結果又出事，曼聯早前簽入文路爾烏加迪，將用呢位烏拉圭國腳取代卡斯米路。