中場唔夠人用！坦哈格焗留基斯甸艾歷臣

因為人手短缺，曼聯主帥坦哈格自打嘴巴，打算留用畀佢雪到硬晒嘅老將基斯甸艾歷臣，至少留到明年1月。

曼聯啱啱喺「雙紅會」淨吞利物浦3蛋，中場完全失勢嘅輸波主因，卡斯米路更加孭晒鑊，另一中場美臣蒙特因傷缺陣亦係原因之一，而佢起碼仲要抖多一排，麥湯米尼又轉投拿玻里，剛加盟嘅文路爾烏加迪又要時間適應，令主帥坦哈格考慮重新起用基斯甸艾歷臣。

艾歷臣上季曾因長居後備，與坦Sir鬧不和，甚至暗寸坦Sir唔識用人，更加冇運行，上場對利物浦只係佢今季首度披甲，都係出得4分鐘咁大把，加上剩番1年合約，為免人財兩失，仲可以將佢賣畀仍未「閂窗」嘅土超（9月13日）或希臘聯賽（9月11日），但依家唔夠人用，加上艾歷臣都唔想離隊，坦Sir惟有死死地氣留人。