唔畀面！卡斯利英格蘭第1擊　彭馬等3星退隊

英格蘭結束「修夫基時代」後，卡斯利暫時出任看守領隊，不過一班國腳似乎唔太畀面，高爾彭馬、菲爾科頓同奧尼屈堅斯3大主力齊齊宣布退隊，唔會參加嚟緊對愛爾蘭同芬蘭兩場歐國聯賽事。

英格蘭大軍周二(3日)集合，曼城球星菲爾科頓因病未有出席，隨後宣布退出國家隊；高爾彭馬同奧尼屈堅斯就有去到基地報到，但經軍醫檢查後，英格蘭足總亦證實兩人會返所屬球會接受康復療程。

英格蘭未有透露高爾彭馬同奧尼屈堅斯嘅傷患問題係乜，但考慮到兩人喺英超頭3場聯賽都踢足，相信問題唔大。英格蘭周日(8日)凌晨會作客愛爾蘭，據報卡斯利暫時未有補選計劃。